Godang dope hita Batak na sopola di boto aha do arti ni hata POHULPOHUL
Jadi songon filsafat ni POHULPOHUL i tar songonon do ;
Molo naeng paoUli Pohulpohul iba, pinohul jala pinisat do itak i gogo dohot tangan ; jadi laos gabe lohot ma tusi gombaran ( bogas ) ni jarijari na lima i.
Simbol do i na paboahon : tung songon na masipisatan pe pangkilalaan dohot pangkataion ditingki na marhata dohot padalanhon adat di parbagason anak dohot boru alai tujuanna na padimposhon partuturan do dohot pa bagas holong ni roha, suman tu Pohulpohul i na gabe dimpos disi pinohul jala pinisat.
Ia bohas ni jarijari na lima i sombol bilangan 5 do i. Lima do partingkian na marlapatan di angka ompunta na jolo, na ginoarna " Hatiha silimalima " i ma :
1. Poltak mata ni ari
2. Pangului
3. Hos ari
4. Guling ari
5. Bot ari
Laos lima do alamat ni roha ni pamatangta i ma :
1. Parnidaan
2. Parbinegean
3. Parnianggoan
4. Pandaian
5. Pangkilalaan.
Jadi tujuan ni bogas ni jarijari na 5 i on do ;
1. Molo niida tondong, ingkon pintor pinangkulingan, tongka do paula so idaon
2. Ingkon tinggil do pinggol msmbege na masa di tondongniba, tongka do paula so begeon
3. Taringot tu parnianggoam : unang ma nian holan ditingki baru saut hunsus, hape tongkin nari bau partondongon i.
4. Taringot tu pandaion : molo ro tondong mamboan sipanganon ingkon patuduhononhon do las nirohaniba. Jala ingkon panganon do na binoan nasida i nang hurang toho tu selera niiba
5. Taringot tu pangkilalaan : naeng ma tongtong sisada pangkilalaan, sisada uli, sisada malu martondong.huhut masihabitan jala masipauneunean.
Jadi songon nidok ni umpasa ma
Madabu unta pangir
Madabu hinuturhutur
Dipangului manang hos ari
Ingkon tongtong ingoton tutur
Tombak ni Sipinggan
Di dolok ni Sitapongan
Di dia pe hita Tinggal
Sai tong ma hita masihaholongan
Eme sitambatua
Parlinggolman ni siborok
Debata ma silehon tua
Sai luhutna ma hita di parorot
Horas jala gabe ma dihita sudena
0 Comments
