Pinggan panungkunan ima pinggan pasu na bontar naso margambar/marbunga ( polos ) na marlapatan ias ni roha dohot pikkiran di saluhut gogo nang pambahenan laho mangido pasu pasu dohot pangoloion di saluhut pangidoanta maradophon hula hula.
Di goari muse do i pinggan pasu na hot di hundulanna songon sada simbol pangidoan tu Tuhan anggiat hot mamasu masu di parngoluonta, jala dibagasan pinggan pasu i dibahen ma isina ima :
1. BORAS PIR manang boras si pir ni tondi jotjot muse idok parbue si ribur-ribur ( sangkambona eme alai ribur jala ramos parbuena ) na patuduhon sihol di hajolmaon di riburni pomparan jala tung aha pe namasa di gulmit ni parngoluonna sai tongtongma dibagasan unduk dohot serep ni roha
Namarharoroan sianon do hata ni umpasa na mandok :
Pir ma pongki bahul bahul pansalongan
Pir ma tondinta saluhutna di lehon Tuhan ma di hita pansamotan
Tubu ma dingin-dingin di toru ni simartolu
Horas ma tondi madingin Pir tondi matogu
Debata do namangiring-iring asa tongtong hita leleng mangolu
2. NAPURAN RATA ima napuran na marbulung na rata bilanganna 5 manang 7 bulung
Songon sada simbol ni ina doi di parngoluan siapari molo adong ro martamue sai jumolo do hajut ni napuranna di peakkon di jolo ni tamue i, rata do bulung ni napuran i songoni ma nang pangidoan asa sai tongtong rata pansamotan dohot panggabean di parngoluanta
Namarharoroan sianon do hata ni umpasa na mandok :
Napuran tano tano rangging marsiranggongan
Badanta pe padao dao tondinta i ma marsigomgoman
3. RINGGIT/HEPENG di goari muse do on Ringgit sitio soara na patuduhon sinadongan ni paranak na mamora naso gulut di hepeng laho mambahen na denggan maradophon hulahula na
4. TANGGO TANGGO ima juhut na tinanggoan na pinangan di ulaoni na marlapatan do i songon sada tangiang dohot pangidoan tu Tuhani anggiat lam tu tanggona solhot ni partuturan tu ari na mangihut
Na marharoroan sianon do hata dohot umpasa na mandok :
Bosur manganton indahan na las mahap marlompan juhut jala sombu minum aek sitio tio
Sai pamurnas ma i tu pamatang saudara tu bohi sipanindak panaili sipaneang holi holi jala si palomak imbulu
Bagot na marhalto ma na niagatan di robean
Horas ma na manganton tu ganda na ma sinadongan di hamu na mangalean
Holan di ulaon marhata sinamot do di patupa pinggang panungkunan, goarna ma daina pinggan panungkunan ( manungkun ) namarlapatan do i songon parhitean ni somba ni paranak tu hula hulana di na laho manungkun utang ( manggarar adat ) ima boli ni boru muli na laho si pasahataon nasida tu hula hulana.
Molo tung adong pe na patupahon di ulaon unjuk naso marhata sinamot dope nasida artianna laos di sadari i do dipatupa marhata sinamot dohot unjutna
Molo nunga mardalan ulaon marhata sinamot naung marpinggan panungkunan, di ulaon unjuk molo dipatupa dope sisongoni dang digoari be i pinggan panungkunan gabe idokma i pinggan panggabei
Dang sude na patupa tanggo tanggo na bolon di atas ni pinggan panungkunan adong do na deba naso patupahon sisongoni
Alai molo tung pe marasing asing pangalahoni ulaon naung taulahoni patubu hamoraon ni parbinotoanta ma i songon nidok ni natua tua
Asing duhut asing sihaporna
Asing luat asing paradatonna
Sidapot solup do na ro
Tarsongonon ma sada tudosan na laho makkatahon pinggan panukkunan
Nunga dison nuaeng Pinggan Panukkunan, Pinggan Pasu na hot di hundulanna,
Sai tio ma di hamu parniidaan tu joloanon, jala hot ma pasu-pasu nasian Tuhanta.
Peak di ginjangna Napuran sirata bulung, napuran tiar asa tung tiar ma antong Passamotan suang songoni dohot Parhorasan jaloon muna tujoloan ni ari on.
Dison adong Parbue Pir, parbue siribur-ribur,
Antong Pir ma pokki bahul-bahul ma pansalongan
Pir ma tondimuna sai tung godang ma pangomoan
jala tung torop maribur ma antong hamu marpinompar
Alani i tung dohonon nami ma,
Nialap ma Piar-piar, sian onan ni huta tinggi
Tudeak na ma hamu marpinompar, bagasmuna sitorop pangisi
Laos adong muse rupiah namararga, napinatupa ni pamarentanta
Sipalas roha ni situan natorop dohot amanta raja, hasoloman ni inanta soripada
Sai martamba ma antong las ni rohanta tu joloan on
Asa dohonon ma songon nidok ni natua tua
Pinantikhon hujur ma di topi ni tapian
Manang tudia pe hita mangalangka sai tongtong ma hita dapotan parsaulian
Songoni muse adong Juhut namarsaudara ima Tanggo-tanggo na bolon,
Sai anggiat ma antong lam tanggo jala togu partuturonta namarhula-hula boru, gabe parhorasan tu joloan on.
Di buat raja parhata ni parboru ma tolu bulung sian hepeng na di pinggani, jala dipasahat tu hasahatanna, laos di paulak ma muse pinggan pasu namarisi hepeng sada bulung nai songon pinggan pangalusi
Songoni majo na boi nigurethon saotik sian huta nami on
Molo tung adong na hurang lobi asa jumolo ma au marsantabi
Sinuan hariara bahen partungkoan di tonga ni huta
Sinur ma napinahan tugabena na niula, na di huta unang marmara
Horas ma hamu na manjaha tumpakon ni Tuhanta Namartua, songonima nang hami na patupahon barita
Horas mardongan tabe