“Mulak singkola hamu annon, denggan hamu mangan da. Cuci piring. Lehon hamu mangan pinahan dung botari”, ninna omakhu manogot tagan so borhat hami tu singkola.
Laos diuduti muse mandok: “laho do omak tu Siantar marpesta”.
Dia do lapatan ni i? Ondo: molo di hami dakdanak na jolo, lapatanna sitau mangallang jagal pesta ma ai boanon ni omakna be ma jagal dohot indahan sian pesta.
Tagan so masuk singkola dasar dope angka dakdanak na jolo, somal do sai dipaboanboan angka inaina ianakhonna i tu pesta.
Sipata tahe sahat rodi na dung hundul di sikola dasar (SD) manang sikola rakyat (SR). Mamereng torop ni bilangan ni ianakhon ni jolma na jolo, olo ma dua tu tolu halak sahali diboan sada inaina ianakhonna tu pesta.
Huhut do sipata diompa posoposo na, ditogu angka anak na i. Dung lam magodang, dang pola sai dohot be angka dakdanak i tu pesta.
Nian sipata ala na diehet donganna. “Eh... sipangihutihut”, ninna.
Gabe mansohot ma angka na umbalga dohot tu pesta. Alai molo apala di hutana pesta, ba tontu do sai dohot nasida hundul di amak i, laos dohot mangan.
Sanga dope niingot mangan pesta pake pinggan aluminium. Dung didok protokol asa dibagi pinggan diparis angka parhobas ma pinggan i. Marmiakmiak do antong sipata pinggan i, ai dang apala ias diburi parpesta na parjolo mamangke. Ido aturanna, si parpesta do mamuri pinggan na nisewa.
Disi ma masa angka naposo ni huta gabe parhobas termasuk sahat tu na mamuri piring. Molo niingot do, somal na molo danga dong sumur di huta i laos holan tu aek ni bondar ni huta i dipaias, ba molo di huta na jonok tu tao toba laos tu tao ma dipaias piring parmanganan i. Dung i dipamasuk tu poti ingananna, jala laos i do muse diboan tu pesta na mangihut.
Di debadeba inganan, anduri na metmet na pinauli sian hotang do dibahen gabe pinggan pesta. On pe tong do songon i, olo do lohot angka teba na sian pesta na parjolo di angka lohitlohot ni anduri i. So sundat olo ma i “dan” on (dan=jamur) molo so apala mahiang disimpan.
Di deba luat, adong parmanganon di pesta mamake anduri na balga, jala marbagi ma manang pigapiha dohot dongan na hombar sahundulan. Di laon-laon ni ari, marganti do anduri i gabe talam na bolak.
Somal ni halak hita do diboan mulak indahan sian pesta, manang na teba pe i asa adong tu pinahan, na deba na dipasisi do i boanonna tu angka na tinggal di jabu.
Molo ahu sai jotjot do hutonahon asa diboan omakhu indahan dohot jagal pesta. Ala najolo dang somal dope marpalastik-palastik songon sisaonari, ia indahan dohot jagal pesta i laos songon i do dipamasuk tu tandok inganan ni sipir ni tondi binoanna tu pesta, ima boras manang eme. Somalna pandan do diletek gabe tandok. Jala marulakhulak do dipangke i inganan ni sipir ni tondi. Sipata masipainjaman tandok do angka ina.
Molo laho omakniba tu pesta nunga sai tarpaima iba diharorona mulak. Laos songon i do bangko ni toropan angka dakdanak. Ai adong ma annon boanon ni angka omakna indahan pesta. Dung binereng antong omakniba dohot angka uduranna mulak sian pesta mamintor nilojong nama on. Habur nibuat tandok on jala laos maringkati dompak tu dapur. So sanga nitingkir isina mamintor nipinainding tu bagasan piring manang sambong laho panganon. Sipata nunga laos marsampur jagal i dohot indahan i. Marsampur muse mai sipata dohot jagal natinanggo ulak ni tandok, manang ulak ni indahan, manang jambar.
Sae ma holan pinasisi ia tanggoan i. Ala ni hojorna olo do sungkot di aru-aru indahan i, sungkot di andora sampe ro ilu manang hasinggohan. Alai tung mansai tabo do antong indahan pesta on nihilala.
Tapamanat ma jolo sangombas tandok i. Sai marulakhulak do dipangke tu sisongoni, jala holan dipampas, dipajomur, baru pe disimpan muse. Sipata do huida adong hutu-hutu ni tandok i apala metmet hira tungo. Sipata orbuhon do tandok i, maturtur ala ni umur. Ditamba muse tu orbuk ni boras dohot eme binoanna tu pesta i. Ima ra marsampur dohot indahan pesta i. Alai nang pe huboto i sai tong do huhasiholi indahan pesta.
Boha ia hamu dongan?
0 Comments
