Sidalian

"Horbo ni Poriaha
Manggagat di robean
Molo roha soada
Godangma sidalian"

Di sada tikki, sangga mangaso huhut mangopi di sada kode kopi di Siantar di pardalanan mulak sian huta tu Medan, tarbege ahuma didok sahalak amanta na tongon hundul di atas karosi na marhombar balok tu karosi hundulannamima songon on: "Ai memang holan hata sidalian do adong di kamusni! Satongkin satongkin marsidalian! Molo na so boi, didok, asa binoto!" Ndang apala binoto ise na marsidalian jala aha sidalianna, alai na dapot nidodo sian panghataion nasidai, tung sudado roha nasida di sidalian ni dongan nasida parsidalian maos i.



Sidalian ndang holan uhuman alasan, alai alasan na mamintori diri do i. Halak na sai marsidalian ima na so hum-roha manang na so tarjalo rohana dicap sala manang siose padan.
Adong piga piga rumang ni sidalian. Na parjolo, marsidalian tu diri sandiri. Na songon on jotjot masa di na manundarnundar parkarejoan. Na paduahon, na mamintori diri marhite na mandiordiori alus na hira tarjaloroha ni dongan, isarani dalan macet, udan por, manang songgot manombo tukkol. Molo on, nang pe tong dang denggan, ndang apala manalahon dongan di sidalian i.

Na patoluhon, sidalian na masitugantuganan. Ibana do na manguduk laho mangulahon alai dipasahat tu halak. Molo tiba tingkina pertanggungjawaban, ibana cuci tangan jala manalahon donganna. Songon ima tong didok dongannai, masitugantuganan. Sidalian on tarlumobi masa tu angka siulaon manang sikarejoan.

Sidalian na paopathon ima na masipabalibalihan di hasalaan dohot tanggungjawab. Molo sidalian on nunga saumur portibi masa. Dung tarjergot si Adam mamangan parbue ni hau na di parsitongaan ni Porlak Eden i, manigor jalo do ibana marsidalian mangalusi sungkun sungkun ni Debata: "Boruboru na nilehonMi do mangalehon tu Ahu, sian i gabe hupangan". Ro si Hawa mandok: "Ulok i do mangelaela ahu".

Alani, na mangose padan jala mangihutma na marsidalian do hape dosa ni jolma na parjolo sahali. Tu dosa na marsidalian i, sahatma uhum ni Debata: Adam (hir hodok mandiori ngolu), Hawa (Hansit parniahapan manubuhon ianakhon), dohot ulok (manjirir butuhana di atas ni tano).

Alani unangbe hita marsidalian, masitugantuganan, manang manginsugut sian angka tanggungjawab dohot kewajibanta. Taparhamaolma angka padan, tanggungjawab, dohot kewajiban i mangihuthon na marsitutu jala marsiadusiadu di angka situhuhon asa ro pasupasu jala tubu ngolungolu.

Na parpudi, dohonontama songon nidok ni umpasa;
"Horbo ni Gompar Tanduk
Maninggala di balian
Molo dung do niunduk
Sitokkama marsidalian"

Comments
0 Comments


EmoticonEmoticon