Adat Marmasuk (Marbongot) Jabu

Adat Marmasuk (Marbongot) Jabu

Adat marmasuk (marbongot) jabu, adong 3 macam:

1. Mangihut-ihut tukang
On ma Adat naummetmet, dang pola piga di jou, cukup ma piga-piga halak menurut Suhut, dang pola marsisungkunan, dang pola marhata Adat Dalihan Natolu.

2. Adat Marmasuk (Marbongot) Jabu
On ma Adat naumum, adat menengah, diundang angka Tutur Dalihan Natolu dohot Aleale, jala sibuaton juhutna namarmiak-miak (margoar). Hula-hula, Tulang mamboan dengke simudur-udur, boras sipirnitondi dohot mangalean Ulos Sitorop Rambu.

3. Adat Mangompoi Jabu (Sibagandingtua)
Adat nabalga do namangompoi jabu, boi ma buaton disi sigagat duhut (Lombu sitiotio) alai dimasak/ditutung namargoarnai (dang tata). Biasa jabu dihuta do na di ompoi, alana molo nunga diompoi dang siganison be jabu i, jabu siinganan turun-temurun nama jabu i jala di goari ma jabi jabu Parsaktian. Diadat mangompoi boi ma baenon ni Suhut di jolona Sambong lao manjalo tumpak siang angka tutur jala Hulahula dohot Tulang boi marhara tutur di Ulaon i, mamboan dengke, Ulos dohot boras ni sipirinitondi, ai marhata Adat Dalihan Natolu nama diulaon i, biasa Panungkun dongan Sahuta, dialusi Paidua ni Suhut, dungi marhata liat, marhata sigabe-gabe/hata pasu-pasu/sihoras-horas. Hapeahan/hasahatan ni margoar nabinuat ni Hasuhuton di Adat Marmasuk manang Mangompoi tu jolo ni Tulang ni Suhut do dibaen rapmangadopi ma nasida dohot hulahula (Simatua) ni Suhut.